Gen 1 | MEU | STEP | Matamana negana ai na Dirava ese guba bona tanobada e karadia.

Genesis 1

Matamana negana

1 Matamana negana ai na Dirava ese guba bona tanobada e karadia. 2 Tanobada na asi oromana bona asi anina; dibura danu gadobada vada e gorua ahu. Bena Dirava laumana na gado kopina ai e loava. 3 Dirava eto, Diari aine vara. Bena diari na e vara. 4 Dirava ese diari e itaia, vada e namo; bena Dirava ese diari bona dibura e haridia. 5 Dirava ese diari ladana e hatoa Dina; dibura ladana e hatoa Boi. Ado e rahi daba e rere, dina gini-gunana.

6 Dirava ma eto, Ḡau ta aine vara gadobada daenai, ranu baine haridia. 7 Bena Dirava ese ḡau ta e karaia, henu ranudia bona atai ranudia ihididia. Bena unu e vara toma. 8 Dirava ese una ḡau ladana e hatoa Guba. Ado e rahi, daba e rere, dina iharuana.

9 Dirava ma eto, Guba henunai e miamu ranudia na ae hahebou, gabu tamona ai, tano kaukauna baine hedinarai. Bena unu e vara toma. 10 Dirava ese tano kaukauna ladana e hatoa Tanobada; bona ranu na edia gabu ai e hahebou ladadia e hato Davara. Dirava ese e itaia, vada e namo. 11 Dirava ma eto, Tanobada ai rei aine vara, bona ava idau-idau mai nadinadidia, bona huahua audia danu mai huahuadia, huahua idau-idaudia mai nadinadidia. Bena unu e vara toma: 12 rei e vara tanobada ai, bona ava idau-idau mai nadinadidia, bona huahua audia mai huahuadia, huahua idau-idaudia mai nadinadidia. Dirava ese e itaia, vada e namo. 13 Ado e rahi, daba e rere, dina ihatoina.

14 Dirava ma eto, Diari ae vara guba ai, dina bona hanuaboi bae haridia, bona toa ai baela, guitau bona lahara toadia, bona dina toadia, bona laḡani toadia. 15 Guba ai bae diari, tanobada bae hadiaria. Bena unu e vara toma. 16 Dirava ese diari badadia rua e kara: badana ese dina baine lohiaia, bona maraḡina ese hanuaboi baine lohiaia eto. Hisiu danu e kara. 17 Dirava ese guba ai e atodia, tanobada bae hadiaria totona; 18 dina bona hanuaboi bae lohiadia bona diari bona dibura bae hididia totona. Dirava ese e itaia, vada e namo. 19 Ado e rahi, daba e rere, dina ihahanina.

20 Dirava ma eto, Mauri ḡaudia momo davara ai ae vara, bona manu tanobada daenai ae roho guba henunai. 21 Bena Dirava ese lakara-donodono bona rui bona davara ai e maurimu bona e reremu ḡaudia iboudiai e karadia, bona roho manudia iboudiai danu. Dirava ese e itaia, vada e namo. 22 Bena Dirava ese e hanamodia, eto, Besemui ba havaradia, ba hutuma, davara idoidiai bae honu honu dae; manu danu bae vara rohoroho tanobada ai. 23 Ado e rahi, daba e rere, dina iha-imana.

24 Dirava ma eto, Tanobada ese mauri ḡaudia idau-idau baine havaradia, boromakau, bona tano ai e raumu ḡaudia, bona tanobada boromadia idau-idau ta ta ena bese ai. Bena unu e vara toma. 25 Bena Dirava ese tanobada boromadia idau-idau bona boromakau bona tano ai e raumu ḡaudia iboudiai e karadia, ta ta ena bese ena bese ai. Dirava ese e itaia, vada e namo. 26 Bena Dirava ma eto, Taunimanima aina karaia, lau laulaugu bona lau heida-idagu; davara gwarumedia bona atai manudia bona boromakau bona tanobada idoinai tano ai e raumu ḡaudia iboudiai ia ese baine biagudia. 27 Bena Dirava ese taunimanima e karaia, ia heida-idana, Dirava ida-idana e karaia: maruane bona hahine e karadia. 28 Bena Dirava ese e hanamodia, eto, Besemui ba havaradia, ba hutuma; tanobada ba hahonua bona ba biagua; davara gwarumedia bona atai manudia bona mauri ḡaudia tanobada ai e loamu iboudiai ba biagudia. 29 Dirava ma eto. A itaia, mai nadinadidia avadia bona mai huahuadia audia vada na henimui, amui aniani; 30 tanobada boromadia iboudiai danu, bona atai manudia iboudiai, bona mauri ḡaudia tanobada ai e loamu iboudiai, na ava raudia vada na henidia, adia aniani. Bena unu e vara toma. 31 Dirava ese e kara ḡaudia iboudiai e itadia, nanamo heherea. Ado e rahi, daba e rere, dina ihatauratoina.